Es Läbe usem Huet

Ha früener wellä anders sii

Sicher anders wien ichs hüttä bi
Am beschtä eine vo dä Coolä
Sicher nie am Bürostuel afulä

Frei wienä Vogel d'Wält erkundä
S'Läbe voll vo erläbnisriche Stundä
Jetz han ich 4 Wuche Ferie im Johr
Stell mirs öppe anders vor

Erhol mi am liebschte no dehei
Ha müeh mis gmüetlichä Näscht z'verloh
Ha gnueg Gält chönnt sicher witer goh
Chas mängisch sälber nit verstoh

Ich gibs zue mir fehlt dr Muet
Für äs Läbe us em Huet
Ha ä Job wo Gäld tuet bringä
Mues nie für äs 10 singä

Mängisch blogt mi s'dumpfä Gfühl
das no öppis in mir usä will
Öppis wo jedä Tag äs bizzli me
Ä Chlumpä im Mage mir tuet geh

Drum schrib ich mini Tegschtli
In mis chlinä, rotä Büechli ine
Tue grüblä über all die Wörter
wo mir so tüen erschine

Freu mi über jede Reim
Wo mir dr Tag tuet bringä
Freu mi über jedes Lied
Won Ich am End cha singä

Ich gibs zue mir fehlt dr Muet
Für äs Läbe us em Huet
Ha ä Job wo Gäld tuet bringä
Mues nie für äs 10 singä